Is próiseas foghlama agus athraithe é oideachas pobail. Tarlaíonn sé laistigh den phobal agus tá sé bunaithe ar riachtanais daoine aonair agus a bpobal. Soláthraíonn sé roghanna foghlama solúbtha do dhaoine ina gceantair áitiúla féin.
Éascaíonn agus tacaíonn an tseirbhís oideachais pobail le ranganna oideachais pobalbhunaithe do raon grúpaí in ionaid áitiúla ar fud Chill Chainnigh agus Cheatharlach. Cuirtear cúrsaí ar fáil i gcomhar le grúpaí pobail éagsúla, mar ghrúpaí na mban, grúpaí míchumais, grúpaí gníomhaíochta lucht scoir agus grúpaí forbartha áitiúla.
Tá go leor teagascóirí ar fáil agus déanfar gach iarracht freastal ar riachtanais an ghrúpa, ach b’fhéidir nach mbeifear in ann i gcónaí na critéir bheachta a theastaíonn ó gach grúpa a chomhlíonadh. I gcásanna den sórt sin, déanfar moltaí maidir le roghanna eile oiriúnacha.
Tacaíonn seirbhís oideachais pobail BOOCCC le seachadadh raon leathan clár oideachais i gcomhpháirtíocht le soláthraithe/grúpaí pobail. Tá tiomantas do chur chun cinn agus éascú na foghlama ar feadh an tsaoil, cuimsiú sóisialta agus forbairt shóisialta/phearsanta i bpobail áitiúla lárnach do sheirbhís oideachais pobail BOOCCC.
Bunphrionsabail an Oideachais Aosaigh agus Phobail:
Tosaíonn cláir oideachais pobail le heispéireas saoil na bhfoghlaimeoirí agus tá siad suite ina saol laethúil agus sóisialta. Éascaítear grúpaí agus daoine aonair ina gcuid foghlama agus tacaítear le riachtanais agus stíleanna foghlama éagsúla. Cuireann oideachas pobail béim láidir ar fhoghlaim fhéinstiúrtha agus ar smaointeoireacht chriticiúil, áit a gcuirtear deiseanna ar fáil d’fhoghlaimeoirí taithí a fháil ar rath ina gcuid iarrachtaí foghlama. Tá fócas an fhoghlaimeora, cuimsitheacht, comhtháthú pobail agus rannpháirtíocht chomhchoiteann ríthábhachtach do chláir oideachais phobail.
